Əhməd
Məmmədli

Mən Cəlilabad rayonunun ucqar bir kəndində böyümüşəm. Gözümü açandan bəri kəndimizdə hüquqdan kənar hərəkətlərin və qanunsuzluğun əyani şahidi olmuşam. Kənd camaatının sosial bərabərsizliyin məngənəsində sıxılmasını ürək ağrısı ilə izləmişəm. Baş verənlərə insanların səssizliyi məndə daha çox qəzəb yaradırdı. Kəndlilərin torpaqlarının zəbt olunması, işsizliyi və təməl hüquqlarını bilməməsi onları elə bir bataqlığa sürükləmişdi ki, özləri ilə birlikdə ailələrini də sürükləyirdilər. Bu gün mətbuatda səs-küylü erkən nigahlar bizim kənddə və ətraf kəndlərdə adi hal idi.Universitetdə oxuyanda başqa regionlardan olan tələbələrlə ünsiyyətdə oldum və anladım ki, bizim Cəngan kəndimiz 86,6 min kvkm ölkəmizin kiçildilmiş modelidir. Əgər kollektiv mübarizə olmasa nə bizim kənd düzələn deyil, nə də ölkəmiz. Həmfikir olduğum tələbələrlə birlikdə təşkilatlanaraq oxuduğumuz universitetlərdə siyasi ayrı-seçkiliyə, rüşvətə və təhsildəki manqurtlaşdırma siyasətinə qarşı çıxdıq və Tələbə Güc Mərkəzi adlı tələbə hərəkatını təsis etdik. Mən bu hərəkatla paralel ölkənin siyasi həyatında aktiv rol almaq üçün Demokratiya 1918 Hərəkatına da üzv oldum. Tələbə yoldaşlarımla birgə tələbələrin haqlarını müdafiə etdik, aksiyalar keçirdik. Aksiyaların müəyyən təsirləri olurdu əlbəttə. Amma problemlərin köklü şəkildə həll edilməsi üçün sistem dəyişikliyi şərt idi. Mübarizə yoldaşlarım da mənimlə bənzər hekayələri olan gənclər idi. Biz tələbə hərəkatının fəaliyyətini genişlətdikcə təzyiqlər dədüz mütənasib şəkildə artırdı. Özü də bu təzyiqlər təkcə bizə yox, valideynlərimizə də sirayət edirdi. 2021-ci ildə atam mən aksiyaya getməyim deyə rayon polis şöbəsində bir neçə saat girov saxlanıldı, özüm dəfələrlə işgəncələrə, təzyiqlərə və hədə-qorxulara məruz qaldım. Hətta bir az da irəli gedərək universitetdən xaric edilməklə hədələndim. Siyasi mühit bir neçə il əvvəl qismən fərqli olduğu üçün ictimai-siyasi fəaliyyət imkanları mövcud idi. Buna görə də tələbə həyatım sona çatıb, məzun olduqdan sonra siyasi sferada aktivləşdim və üzv olduğum Demokratiya 1918 Hərəkatına 2021-ci ildə sədr seçildim və fəaliyyətim ön plana çıxdıqca repressiyaların şiddəti də güclənirdi. Təzyiq və işgəncələr artıq həbs dalğasına çevrilmək üzrə idi və belə də oldu. 2022-ci ildə Azərbaycan və Ermənistan arasındakı hərbi toqquşmalar zamanı sülh çağırışı etdiyim üçün 30 gün müddətində həbs edildim, magistratura səviyyəsində xaricdə təhsil üçün aldığım qəbul sənədi "saxta" elan olundu, ölkədən çıxışıma qadağa qoyuldu və ixtisasım üzrə çalışdığım iş yerindən, kirayə yaşadığım mənzildən belə çıxarıldım. Lakin hətta mənə elan edilən və ölkədən çıxışıma mane olan cinayət işi ilə bağlı heç bir sübut təqdim edilmədi.2025-ci ilin martın sonu hava limanında yenidən ölkədən çıxışıma bu dəfə Baş Prokurorluğun qadağa qoyduğunu öyrəndim. Həmin hadisədən 38 gün sonra həbs edildim. Bu müddət ərzində izlənildiyimi hiss edirdim. Buna görə də təsadüfi deyil ki, mənim şərlənməyimdə vasitəçi olan "zərərçəkən" və bir nəfər saxta şahid mən yaşadığım ərazidən cəmi bir neçə km uzaqda yaşayırdı. Hətta hər ikisi eyni yaşayış binasında kirayədə qalırdılar. Şübhə etmirəm ki, bu şəxslərə tapşırıq mənim həbsimdən daha əvvəl verilib. Mayın 6-sı 2025-də gecə evə qayıtdığım taksidə olan bu polis agentləri saxlanılarkən taksidə əli-qolu bağlı olduğum halda "hadisə yerində" xüsusi fəallıq göstərdilər və mənə verilən fiziki işgəncədə cani dildən rol aldılar. Gözümün qarşısında hadisə yeri lentləndi, mən qandallı polis maşınında olanda pəncərədən bayırda gedən qısametrajlı filmə baxırdım. 10 dəqiqənin içində lentlər çəkildi, polis müstəntiqi öz atdığı bıçağı yerdən götürüb sübut qutusuna qoydu, saatlarla insanlar can verəndə gəlib çıxmayan ambulans maşını 5 dəqiqəyə gəldi və bıçaqladığım iddia edilən Vüqar Dünyamalıyevi təntənəli şəkildə götürüb apardılar. Filmin 1-ci hissəsi bitdi, ikinci hissəsinə başlamaq üçün mülki və rəsmi polis maşınları hərəkətə gəldi. Aparıldığım Binəqədi rayon polis idarəsində ilk növbədə telefonumun parolunu istədilər, daha sonra verdikləri suallara onların istədikləri kimi cavablar verməyimi tələb etdilər. Mən bundan imtina edib vəkilimi tələb edəndə gözümə, boynuma və başıma, eyni zamanda bədənimin müxtəlif hissələrinə zərbələr endirdilər, tabe olmadım, bu dəfə bədənimin fərqli yerlərinə "tok" verdilər. Yenə də cavab vermədim və bir müddət sonra gözümdən aldığım zərbə nəticəsində döşəmə qan gölməçəsinə döndü və huşumu itirdim. Huşumu itirənə qədər məni beysbol çubuğu ilə vurub dişimi sındırdılar. Gözümü açanda müstəntiq burnuma naşatır spirti qoxladıb ayıltmağa çalışırdı. Deyəsən ölə biləcəyimdən ehtiyat edib məni sürüyə-sürüyə müstəntiqin otağına aparmışdılar. 2 gün sonra Binəqədi rayon məhkəməsinin hakimi müstəntiq və məni həbs edən idarənin göstərişi ilə səssizcə 4 aylıq həbs qəti-imkan tədbiri seçdi. Həmin məhkəmə prosesində də bəyan etdim ki, mənim həbsim və ittihamın ağırlığı ədalət tərəzisini tutan Femidanın zorlanmasıdır. Nə ibtidai istintaqda, nə də məhkəmə istintaqı zamanı hətta saxta cinayət işinin əsas motivini təşkil edən və adam öldürməyə cəhd etməyin cinayət aləti sayılan bıçaqda belə heç bir əl izim aşkarlanmadı. Əgər mənim yerimə başqası olsaydı, hətta ibtidai istintaqda belə işimə xitam verilərdi, normalda məhkəmə istintaqı belə hallarda ittiham olunan şəxsə bəraət verməlidir. Amma mən hələ də bu vəziyyətdə 10 aydır həbsdə saxlanılıram. Eyni zamanda ziddiyyətli şahid ifadələri, hətta şahid qismində cəlb edilən 2 polis belə açıq-aydın şəkildə ifadə verdilər ki, "biz Əhməd Məmmədlinin adam bıçaqladığının şahidi olmamışıq." Hadisə yerinə yaxın ərazidə yaşayan şahid bildirdi ki, onu ümumiyyətlə evə getdiyi yerdə sahə rəisi saxlayıb və müstəntiqin təkidi ilə oxumadığı ifadəyə qol çəkib. Paralel olaraq cinayət işi ilə bağlı ifşaedici əhəmiyyətə malik kamera görüntüləri, " zərərçəkən" hesab edilən şəxsin tibbi əməliyyat görüntüləri və ittihamı darmadağın edən vəsatətlərimiz məhkəmə heyəti tərəfindən təmin edilmədi. İşin siyasi sifariş olduğunu görmək üçün sizcə artıq bir izaha ehtiyac qalırmı? Və ya son 6 ayda (həbs edilənə qədər) hakimiyyəti narahat edən hüquq müdafiəçiliyi və jurnalistik fəaliyyətimin həbsim üçün daha əvvəldən təxirə salınan planın tərkib hissəsi olduğunu başa düşmək üçün iki göz, iki qulaq, bir də ağıldan kəm olmamaq kifayət edir. Sonda haqsız məruz qaldığım həbsim dövründə məni müdafiə edən hər kəsə təşəkkürümü bildirirəm! HƏR ŞEY YAXŞI OLACAQ BİR GÜN, AMMA HƏR ŞEY PİS OLANDAN SONRA...

Bakı Apelyasiya Məhkəməsinin dünənki “məhkəmə” prosesində tanınmış gənc jurnalist və ictimai-siyasi xadim Əhməd Məmmədli qısa və konkret vəsatətlə çıxış etdi: hamınız, həm zaldakılar, həm hakimlər yaxşı bilir ki, barəmdə xeyli primitiv və saxta bir “cinayət işi” qurulub; demə, (guya ki) “bıçaqladığım” və təsadüfən hadisə yerində olmuş sürücü və iki şahidin də eyni regiondan (Naxçıvan) və hətta feysbukda da bir-birinə “dost” olmaları “təsadüfi” imiş; “istintaq” sənədləri üzərindəki “bıçaq”ı isə nə mən, nə “zərərçəkmiş”, nə şahidlər görməyiblər, halbuki, heç olmasa, görüntü naminə “əl izlərimiz” götürülməli idi. Hadisə yerinə də əvvəlcədən polis və “təcili yardım” maşını gətirilibmiş; bu qurma saxta işin təfsilatını müstəntiq də, prokuror da, hakimlər də yaxşı bilirlər; amma vəsasətim fərqlidir: artıq bir ilə yaxındır ki bu qədər mənəvi, psixoloji, fiziki təqib və təzyiqlər nəticəsində səhhətimi, şəxsi (və iki il öncə qurduğumuz xoşbəxt ailə) həyatımı itirmək üzrəyəm; artıq ağır asma xəstəsiyəm, əlimdəki bu aerozoldan ayrıla bilmirəm, tənginəfəslikdən boğuluram, görmə qabiliyyətimi də itirmək üzrəyəm; çətin ki, başıma gətirilən bu qədər ağır işgəncələrə 6 il də dözüm; odur ki, Məhkəmədən tələbim budur: ya mənə bəraət verib ev şəraitində müalicəmi davam etdirməyə şərait yaradılmalı ya da ki bu qədər dözümsüz ağır işgəncələr əvəzinə, birdəfəlik “edam hökmü”nu verin ki, həm öz canım, həm də sizin canınınz qurtulsun bu saxta işdən…
Vəkil Elçin Sadıqovun da müvafiq vəsatətlərindən sonra məşvərətə getmiş hakimlər “6 il işgəncə” hökmünü daha məqbul saydılar…
Neylək, əziz Əhməd bəy və Türkan xanım, möhkəm olun, inşallah, Allah sizi və cəmi digər siyasi məhbuslarımızı darda saxlamaz, tezliklə AZADLIQda belə xoş şəkillərinizi paylaşasınız!

Əhməd Məmmədlini ilk dəfə Neftçalada Vəfa Nağının seçki kampaniyası zamanı görmüşdüm. Amma onun fəaliyyətini daha əvvəl, hələ Tələbə Güc Mərkəzində olduğu dövrdən sosial şəbəkələr vasitəsilə izləyirdim. Əhmədə və onun fəaliyyətinə baxanda, yeni dövr üçün vacib ola biləcək bir siyasətçi obrazı görürdüm. Düzdür, Əhməd çox gənc idi. Amma məhz belə gənc və perspektivli insanların siyasi proseslərə qoşulması Azərbaycanda uzun illər davam edən repressiyalar fonunda cəmiyyətdə siyasətə və siyasətçilərə itirilmiş inamın bərpasına ciddi təsir göstərə bilərdi. Mən bunu onun özünə də demişdim.

Amma təəssüf ki, bu günkü Azərbaycanın reallığı tamamilə başqadır. Azərbaycanı idarə edən Əliyevlər ailəsi nə yeni bir dövrün gəlməsini, nə də Əhməd kimi insanların bu prosesə töhfə verməsini istəyir. Azərbaycanda aşağıdan gələn istedadlı və bacarıqlı gənclərin, hakimiyyətə yüksək loyallıq göstərmədən, siyasi elitanın bir hissəsinə çevrilməsi nəinki çətindir, demək olar ki, mümkün deyil. Səbəb isə əslində sadədir: bu cür sağlam düşüncəli gənclərin həyata və ictimai-siyasi proseslərə baxışı real dəyişiklik potensialı yaradır və bu dəyişiklik avtoritar rejimin sonunu sürətləndirə bilər. Elə buna görə də, digər siyasi fəallar kimi, Əhməd də hələ 2025-ci ildə uydurma ittihamlarla həbs olunmamışdan əvvəl belə davamlı təzyiqlərlə üzləşirdi.

Son illərdə isə Azərbaycanda siyasi fəaliyyətin demək olar ki, tamamilə qadağan olunduğu bir şəraitdə o, bu prosesə media vasitəsilə töhfə verməyə çalışırdı. Bu, xüsusilə Yoldaş Media ilə bağlı təşəbbüsündə açıq şəkildə görünürdü. Azad medianın demək olar ki, tamamilə sıradan çıxarıldığı bir dövrdə o, yaranmış boşluğu öz şəxsi təşəbbüsü ilə doldurmağa çalışırdı. Elə bu prosesdə yollarımız ikinci dəfə kəsişdi. Mən Yoldaş Medianın YouTube kanalında Polşada təhsil mövzusuna həsr olunmuş bir podkastda iştirak etmişdim və doktorantura təcrübəmi paylaşmışdım. Əhməd Yoldaş Medianı yeni qurmuşdu və demək olar ki, tək fəaliyyət göstərirdi. Buna baxmayaraq, digər siyasi məhbusların məhkəmələrini işıqlandırması və tədricən auditoriya toplamağa başlaması hakimiyyəti narahat etməyə bilməzdi, və etdi də.

Onunla həm məhdud şəxsi ünsiyyətimdən, həm də ictimai fəaliyyətini izləməyimdən gəldiyim əsas nəticə odur ki, Əhməd çox mədəni və son dərəcə nəzakətli bir insandır. Açığı, belə bir insanın guya taksidə kiməsə zor tətbiq etməsi, qəsdən sağlamlığa ağır zərər vurması və xuliqanlıq kimi maddələrlə 6 il azadlıqdan məhrum edilməsi məndə həm təəccüb, həm də ciddi suallar doğurdu.Təəccübümün səbəbi sadədir, mən Əhmədin belə bir davranış göstərə biləcəyinə inanmıram. Hətta hansısa konfliktli vəziyyətdə belə onun zor tətbiq edəcək biri olduğunu düşünmürəm. Bəs niyə məhz bu cür ittihamla həbs olundu? Məncə, bunun əsas səbəbi onun fəaliyyəti ilə bağlıdır. Yoldaş Media şəxsi təşəbbüs idi və onu klassik ittihamlarla, məsələn qaçaqmalçılıq və ya digər “standart” cinayət maddələri ilə hədəfə almaq çətin idi. O sadəcə YouTube kanalı açmışdı və buna Yoldaş Media adını vermişdi. Bu adın özündə belə müəyyən bir müqavimət mesajı var idi. Üstəlik, ölkədə müstəqil medianın demək olar ki, tamamilə susdurulduğu bir vaxtda bu kanal alternativ informasiya mənbəyi kimi formalaşa bilərdi. Düşünürəm ki, məhz bu perspektiv hakimiyyəti narahat edirdi. Amma onu jurnalist kimi həbs etmək də onlar üçün sərfəli deyildi. Çünki bu, onsuz da çox olan siyasi məhbus jurnalistlərin sayını açıq şəkildə artıracaqdı və beynəlxalq reaksiyaya da təsirsiz ötüşməyəcəkdi. Ona görə də mən hesab edirəm ki, Əhməd Məmmədlinin hədəf alınmasının və qurama ittihamlarla 6 il azadlıqdan məhrum edilməsinin əsas səbəbi məhz Yoldaş Media üzərindən başladığı fəaliyyət idi.

Sonda bir məqamı da qeyd etmək istəyirəm. Mən inanıram ki, bir gün gələcək və Əhməd Məmmədli də daxil olmaqla, Azərbaycanın müstəqillik tarixində siyasi səbəblərlə həbs olunmuş insanların hər birindən dövlət rəsmi şəkildə üzr istəyəcək. Hətta onların bəzilərinin sonradan bugünkü rejimlə əməkdaşlıq edib-etməməsindən asılı olmayaraq. Bu, həm ədalət, həm də cəmiyyətin normal gələcəyi üçün zəruridir.

Əhməd Məmmədli ilə tanışlığım sosial şəbəkə üzərindən olub. Analitik təfəkkürü diqqətimi çəkdiyi üçün bu gənci izləyirdim. Məzunu olduğum universitetin tələbəsi olması da onu digərlərindən nisbətən mənə bir köynək yaxın etmişdi.
Tələbə dostları ilə birlikdə “Tələbə Güc Mərkəzi” yaratmış, tələbələrin hüquqlarını və universitetdaxili problemləri sosial şəbəkələrdə gündəmə gətirir, bəzən etiraz aksiyaları da keçirirdilər. Səhv xatırlamıramsa, belə aksiyalardan biri də LDU-nun qarşısında olmuşdu.
Sonradan D18 Hərəkatının sədri seçildi. Hərəkat daxilində bir neçə radikal islahat xarakterli addımlar atdılar. Daha sonra ölkə daxilində siyasi repressiyalara etiraz əlaməti olaraq D18 Hərəkatını buraxdılar. Bir müddət sanki proseslərdən çəkilmişdi.
Hamoşamda bələdiyyə sədri olduğum vaxt mənə yazıb, Hamoşama gəlib kəndin sosial problemlərini işıqlandırmaq istədiyini bildirdi. Siyasətlə başlasa da, artıq jurnalist kimi fəaliyyət göstərirdi. İlk görüşümüz də Hamoşamda oldu. Həyat yoldaşı Türkan xanımla gəlmişdi. Uzun-uzadı keçmişdən və gələcəkdən söhbət edib, problemləri və perspektivləri müzakirə etdik. Eyni zamanda kəndin sosial problemlərini, ayrı-ayrı insanların çətinliklərini işıqlandırdı. Bəzilərinin nəticəsi də oldu.
Yeri gəlmişkən, məndən də bir müsahibə aldı. Müsahibə zamanı “Deputat olsam, ilk çıxışımı talışca edərəm” ifadəsini işlətdim. Proqressiv düşüncəli bir gənc kimi bu sözüm onun xoşuna gəlsə də, fəaliyyətdə olan bələdiyyə sədri və növbəti seçkiyə hazırlaşdığımı nəzərə alaraq bu ifadəni dəyişməyi tövsiyə etdi. Lakin mən əksinə, bunu manşetə çıxarmaqda israr etdim. Bunu yazmaqda məqsədim odur ki, Əhməd bəy jurnalist kimi sensasiya axtarmırdı, əksinə müsahibini maksimum nəzərə alan bir jurnalist idi.
Yeri gəlmişkən, seçki dönəmində texniki məsələlərdə köməkliyi də məhz Əhməd bəy etmişdi.
Sonra isə əsassız olaraq şərlənib həbs olundu. Əhməd kimi gənclər bu ölkənin gələcəyidir. Onlara belə münasibəti görmək məni incidir. Ümid edək ki, haqq-ədalət bərqərar olar, Əhməd də daxil olmaqla bütün siyasi məhbuslar tezliklə azadlığa çıxar. Əhməd kimi azad gənclərin yeri zindan deyil

1937-38-ə rəhmət oxutduran şok(!) olaylar…

Bu gün (4.12.2025) tanınmış ictimai fəal, jurnalist Əhməd Məmmədlinin saxta ittihamlarla qurulmuş cinayət işi üzrə növbəti məhkəmə iclasında eşidib-gördüklərimizin şok anlarından hələ də ayılmamışıq; nə baş verir bu gün ölkəmizdə? Bu qədər qanunsuzluq və dərəbəyliyin arxasında kimlər ya hansı qüvvələr dayanır?
23-24 yaşlı azadfikirli bir gəncin həbsindən ötrü bəlkəm heç rəhmətlik Şerlok Holmsun da yuxusuna gələ bilməyəcək fantastik qurma oyunlar: axı, biçarə Əhməd, nə biləydi ki, onunla bərabər taksiyə (sağında və solunda) “təsadüfən” oturan o iki sərnişin Naxçıvanın eyni məntəqəsindən gətirilmiş bir-birinə yaxın iki “rəsmi” “işverən” imiş?! Yəni, o “yazıq” Naxçıvanlı “işverənlərə” bu qədər əzab-əziyyətli yol ölçüb gətizdirilməyə nə hacət var idi, - məgər Bakıda azmı onlardan?!
İki polis şahid də dindirildi; demə, onlar da təsadüfən hadisə yerindən keçiblərmiş və bu “bıçaqlama” cinayətilə rastlaşıblar… Hələ bu nədir ki?! Demə “Təcili Yardım” maşını da orada “təsadüfən” peyda olubmuş; təsadüfən 1-2 mülki şahid də gəlibmiş… və s. və s….
Vallahi, şokdan ayılmamışıq hələ də… Eşidib-gördükləri şokdan bəlkəm elə dövlət ittihamçısı, hakimlər də bu gecə rahat yata bilməyəcəklər, çünki hətta onların da gözləri bərəlmişdi, yəqin ki ilk belə ağır “zakazlı” işlə rastlaşıblarmış…
İnşallah, “Şok! Şok! Şok!” davamı 8 dekabr 11.30 saxlanıldı… maraqlananlar iştirak edə bilərlər, amma ürəyi zəif olanlar gəlməyə də bilər…

Kaş ki zərrəcə müstəqillik veriləydi bu hakimlərə, dövlət ittihamçılarına… Hər dəfə bu məhkəmə prosesləri təxirə salınanda nədənsə özləri də çox sevinirlər. Belə ki, düz 10 aydır ki 25 yaşlı gənc jurnalist Əhməd Məmmədlinin qondarma istintaq-məhkəmə prosesi gedir, hələ də guya bıçaqlanan “zərərçəkənin” hansı xəstəxanada müalicə aldığı barədə Ambulator Tibb Kitabçası ortaya çıxmırdı ki çıxmırdı… Nəhayət ki, vəkillərin tələbiylə bu gün o kitabça “tapıldı”; odur ki, bu saxta kitabçanın da diqqətlə araşdırılmasını tələb edən vəkil Elçin Sadıqovun vəsatətiylə növbəti (bəlkəm son) məhkəmə iclası 16 mart 15.30 vaxtına saxlanıldı. Əlbəttə ki, hətta o kitabçanın hər sətrinin saxta olduğu belə ortaya qoyulsa, çətin ki hakimlərə tapşırılan hökm rəqəmləri dəyişsin… Amma bu gün hakimlərin və hətta o xeyli kəskin mövgeli dövlət ittihamçısının 3-4 gün də vaxtın uzadılması sevincini görəndə, Əhmədə yox, bu məzlumlara daha çox təskinlik vermək istədik: kaş ki azca da olsa sizə müstəqillik veriləydi…

“Talışlar oyaqdır, Əhməd bəyə dayaqdır!”…

Ən gənc vicdan məhbusu Əhməd Məmmədlinin bugünki məhkəmə prosesində səslənən bu şüar heç də təsadüfi deyildi: məhz hələ ilk gənclik-tələbəlik illərindən Talışların milli-mədəni hüquqlarının müdafiəsinə qalxdı Əhməd bəy, - onun Lənkəran Dövlət Universitetinin binası qarşısındakı tarixi aksiyasını heç kim unutmayıb. Sonralar da bu gənc tələbə öz cəsarətli çıxışları ilə seçilərdi; Qondarma ittihamlarla həbs edilmiş gənc alim-pedaqoq İqbal Əbilovun da ilk müdafiəçilərindən idi; Talış mahalındakı bir çox ictimai-mədəni tədbirləri də ilk işıqlandıran Əhməd idi…Bu gün nəinki İqbal Əbilovun Hüquqlarını Müdafiə Komitəsinin fəalları, o cümlədən İqbalın ana-atası da Əhmədə mənəvi dəstəkdən ötrü məhkəmədə iştirak etdilər. Əhməd hamıya öz minnətdarlığını bildirdi. Yalnız bircə şahid dindirildi, o da təsadüfən Əhmədlə bağlı hadisənin müşahidəçisi olduğunu bildirməklə yanaşı, onun adından yalan və təhriflərlə yazılmış istintaq izahatını qəbul etmədiyini bildirdi; Növbəti məhkəmə prosesi 13 noyabr 12:30 vaxtına saxlanıldı. Guya “zərərçəkmiş” dindiriləcək… Əlbəttə ki, digər siyasi məhbus proseslərində olduğu kimi, bu məhkəmə də “şou”dan başqa bir şey deyildi… Əsas odur ki, hər iki gənc - 25 yaşlı Əhməd və 35 yaşlı İqbal nikbindirlər və inşallah, tezliklə hər ikisi digər siyasi məhbuslarımızla birgə Azadlıqda olacaqdır…
Əhməd bəyin huquqlarını müdafiə komitəsinə və məxsusən də Əhmədin fədakar xanımı Türkana qələbə uğurları diləyirik! Bıjionən! Şimon!

Tanınmış jurnalist, vicdan məhbusu Əhməd Məmmədlinin bu günki məhkəmə prosesi təxirə salındı. Əsas səbəb bu oldu ki, vəkil Elçin Sadıqlının vəsatəti ilə “zərərçəkənin” ambulator tibb kitabçası hələ də Məhkəməyə təqdim edilməmişdi. Sual olunur: guya Əhmədin “bıçaqladığı” bu “zərərçəkmiş” həqiqətən hər hansı xəstəxanada müalicə alıbmı? Görək, 12 mart, 17.30-a təyin olunmuş növbəti məhkəmə prosesi bu və digər suallara aydınlıq gətirəcəkmi?! Hətta bu bir həftə ərzində tələm-tələsik saxta “ambulator kitabçası” hazırlansa belə, həmin “sənəd” daha çox yeni sualları ortaya qoymayacaqmı? Görəsən, 10 aydan artıq vaxt ərzində tamamilə qondarma ittihamlarla haqsız zindan məşəqqətlərinə məruz qalmış 25 yaşlı fədakar jurnalist Əhməd Məmmədliyə qarşı davam etməkdə olan bu qədər şər, böhtan və qərəzkarlığın arxasında kimlər və hansı bədxah məqsədlər dayanır? Neylək, növbəti şou- məhkəmə xəbərlərini gözləyək…

“Bir manatlıq şəxs” kimdir?

Bu gün (12.02.2026) Bakı Ağır Cinayətlər Məhkəməsində tanınmış jurnalist Əhməd Məmmədlinin növbəti şou məhkəmə prosesi də xeyli qısa (20-25 dəq) və həm də dövlət ittihamçısının müttəhimi daha təhqiramiz şəkildə alçaltması ilə yadda qalan oldu. Belə ki, ötən məhkəmə proseslərinin (18.09.2025) birində Əhməd bəy guya “bıçaqlanma” ilə nəticələnmiş məcaralı həbsinin təfərrüatından ifadə verərkən, - “mən siyasi baxışlarıma görə belə qurama yolla həbs edilmişəm” fikrinə, prokurorun - “axı, sən nə böyük bir şəxs idin ki, sənə qarşı bu qədər geniş miqyaslı bir əməliiyat hazırlanmışdı, - məs., cibinə narkotik atıb həbs edə bilməzdilər?!” etirazı hətta zaldakıların da heyrətinə səbəb olmuşdu…Bu gün isə taksi sürücüsi şahid qismində dindirilərkən, Əhmədin növbəti iradı prokuroru cin atına mindirdi. Belə ki, Əhməd ifadəsində bildirdi: axı, bu necə ola bilər ki, bir neçə milyonluq Bakıda üzümə duran bu 3 şahidin (taksi şoferi və arxada mənimlə yanaşı oturan 2 şahid) üçü də Naxçıvanın eyni yerlərindəndir, bu qədər təsadüf ola bilərdimi? Prokuror dərhal onun sözünü kəsib dedi: niyə olmur ki, Naxçıvanın da əksəriyyəti bu gün Bakıda yaşayıb-işləyir və özün kimsən ki, - “1 manatlıq şəxs”sən də…
Əlbəttə ki, prokurorun bu təhqiramiz fikrinə Əhməd dərhal cavab verdi: mən 1 manatlıq şəxs deyiləm, adama 1 manat ödənişli taksinin sərnişi olmuşam, təhqirə keçməyin”. Prokuror daha da hiddətləndi: özün başa düşdün, nə demək istədiyimi, sözdən söz çıxartma! Növbəti proses 5 mart, 12.00-ə təyin edildi.

Bu gün Əhməd Məmmədlinin (Əhməd Məmmədlinin Hüquqlarını Müdafiə Komitəsi) məhkəməsində dövlət ittihamçısı az qala öz dili ilə ölkədəki siyasi məhbusların necə qondarma metodlarla həbs edildiyini etiraf etdi. Belə ki, Əhmədin - “mən siyasi baxışlarıma görə belə qurama yolla həbs edilmişəm” fikrinə, onun - “axı, niyə də “bıçaqlanma” ilə şərlənməli idiniz, narkotik ilə həbs edilməmisiniz ki… ?!” etirazı hətta zaldakıları də heyrətə gətirdi…
Amma Əhməd Məmmədli və vəkili Elçin Sadıqov çox sadə və məntiqi dəlillərlə təşkil edilmiş bu qurama oyunun tamamən puçluğunu ortaya qoydular.
Hər halda, yenə də ümüdvar olmaq istərdik ki, ölkəmizdə azad və müstəqil məhkəmə-istintaq gec-tez bərqərar olacaq və cəmi digər siyasi məhbuslarımız kimi, bu gənc də tezliklə azad ediləcəkdir…

Əhməd ilə tanışlığım onun həyat yoldaşı Türkan xanım sayəsində olub.
Peşə məktəbində aşpazlıq kursuna yazılmışdım. Hər şey tam qaydasında gedirdi. Dərslərin arasında ingilis dili də var idi. Mən isə ingilis dilini bilmirəm deyə testlərdən geri qalacağımı düşünürdüm və buna görə çox narahat idim, həmçinin digər qrup yoldaşlarım da eyni narahatlığı keçirirdilər.

Əhmədin həyat yoldaşı Türkan xanım yoldaşının bizə kömək etməsi üçün onunla danışdı, sonra Əhmədin bizə tam təmənnasız ingilis dili dərsi keçəcəyini bildirdi və bizi evlərinə dəvət etdi. İlk görüşdə Əhmədin mehribanlığı və səmimiyyəti çox xoşuma gəldi. Bir sözlə, onu daha çox tanımağa çalışdım və onun düşüncələri, davranışı, insanlara yardım etmək istəyi mənə çox xoş gəldi. Həmin dönəmdə bir sıra problemlər yaşayırdım. Sonra Əhmədlə bir sıra düşüncələrimi paylaşdım. Bir çox mövzuda mənə yardımçı oldu.

Əhməd və xanımı Türkan xanım — ikisi də çox əziz və dəyərli dostlara çevrildilər mənim üçün.
Sonralar bu dostluq münasibəti mənə dəyərlim olacaq varlığı qazandırdı — pişiyim Buludu.

Ümid varam ki, Allah etdiyin yaxşılıqları qarşına çıxaracaq, əziz dostum. Sən güclü bir insansan inşAllah yaxınlarına, sevdiklərinə, ailənə qovuşarsan. Yaxşı ki, varsan. Yaxşı ki, səni tanımışam.

Axşam yenə bir həbs xəbəri aldıq daha doğrusu oğurlanma.Telefonda Əbdüllə yazışırdı, saat 22:19 axırıncı mesaja baxdı, 22:23-də olan mesaja baxmadı. Eşitdiyimə görə kiməsə xəsarət yetirmə deyirlər. Bu nağılları gedin özünüz danışıb özünüz də inanın. Əhməd o qədər mədəni bir gəncdir ki, o nəinki kiməsə xəsarət yetirə, kiməsə artıq söz deyib xətrinə dəydiyinə belə inandıra bilməzsiniz heç kimi. Yaxşı baxın görün sizmi ona xəsarət yetirmisiniz yoxsa o kiməsə !?

Axşamdan bu streslə necə yatdıq bilmədik. Səhər həmin streslə durduq, Əbdül əsəbdən divara bir iki yumruq vurdu, "getmirəm dərsə cəhənnəm olsun dərs keçən də yoxdur məktəbdə" deyərək əslində içində yaşadığı stresi boğmağa çalışırdı.Uşaq nə qədər stres yaşayar? O gün deyirki "ana, fikirləşirəm bayırda heç kim qalmayıb". Çünki ata həbsdə, əziz bildiyi sevdiyi əmiləri həbsdə, indi də Əhməd həbs olundu.

Əhməd sanki böyük qardaşı idi Əbdülün, onun təhsilini həmişə diqqətdə saxlayırdı. Əhməddən nə qədər danışsaq da siz heçnə anlamayacaqsınız. Belə gənclərə müxtəlif sahələrdə şərait yaradılmaqdansa onları şərləyərək həbs edirsiniz. Parlaq gənclərimizdən çirkli əllərinizi çəkin, bəsdirin.

Əhməd bu Ölkənin işıqlı və savadlı gənclərindəndir. Əxlaqlı, mədəni, bir qarışqanı belə incitməyəcək qədər vicdanlı biridir. Bu gün cəmiyyətin, gənclərin maariflənməsində Əhməd o qədər töhfələr verə bilərdi amma çox heyifki ondan faydalanmaq əvəzinə onu cəzalandırmağı seçdilər. Çox təəssüf edirəm. Əhməd kimi gənclər bu ölkənin parlaq gələcəkləridir. Gələcəyimizi göz görə-görə məhv edirlər. Biz heçnə edə bilmirik.

"Mülksüzlər" adlı azadlıqla bağlı məşhur kitabda belə bir ifadə var; "İyirmili yaş dolaylarında elə bir an vardır ki; həyatının geri qalanı boyunca ya hamı kimi olmağı, ya da fərqliliklərini ərdəmə çevirməyi seçməyin lazım olur".

Əliyevin kenquru məhkəməsi bu gün də Əhmədə 6 il həbs verdi. O nə Əliyevin əsgəri olmağı qəbul etdi nə də başqa cür ona tabe olmağı. Əhmədi, azad edilməli olan başqa məhbuslardan fərqləndirən həm də onun dünyaya baxışı və ən insani və azadlıqçı bir dünya görüşünü, ideologiyanı mənimsəmiş olmasıdır. Özünün də dediyi kimi, gec olacaq amma yaxşı olacaq..

Bir dəfə Əhməd pişiklərini Bakıya gətirmişdi ki, həkimə göstərsin. Geri qayıdanda görüşdük, oturub çay içdik, dərdləşdik. (Əhmədlə görüşməyimiz o, təsadüf hallarda Bakıya gələndə alınırdı.) Əhməd dedi ki, Lənkərana qayıtmaq üçün taksi sürücüsü gəlib onu da götürməlidir. Mənə dedi, sən də min, sizin kəndin yanından keçəcəyik, elə orada düşüb gedərsən evə. Nəsə, taksi gəldi, oturduq...

Həmin taksi 5-ə yaxın adam götürürdü. Əhməd də gedib ən arxada, mənsə ən qabaqda, sürücünün yanında oturmalı oldum. Çünki biz maşına minəndə 1 yaşlı xanım, bir də oğlan ortada oturmuşdu. Sonradan bir ortayaşlı adam mindi, o da onların yanında oturdu...

Əhmədi Lənkərandan Bakıya da elə bu sürücü gətirmişdi. – Əhmədə qayıtdı ki, "ərinmirsən, 3 dənə pişiyi qoyub qəfəsə, gətirmisən Bakıya ki, həkimə göstərəsən?" Maşındakılar gülüşdü... mənə də bunların belə normal şeyləri daş dövründə yaşayırmış kimi qarşılamağı xoş gəlmədi. Həmişə elədiyim şeyi elədim: Ürəyimdə söydüm bunları. İstədim nəsə cavab verim, sonra "lənət şeytana" deyib, başladım telefonla oynamağa ki, heç kim danışdırıb eləməsin. Nəsə deyəcəklər, acılayacam. Sonra gəl bunlarla mübahisə elə...

Əhməd o dəqiqə cavab verdi ki, "insanların ucuz tutulduğu ölkədə heyvanlara qarşı belə münasibət görməyiniz sizi çaşdırdı, hə?" – sürücünün də, o xalanın da, kişilərin də üzündəki təbəssüm işığını Mingəçevirdən söndürdülər elə bil. Diqqətlə üzlərinə baxdım. Bu boyda həqiqətlə üz-üzə gəldiklərinə görə, üzlərinə yad bir ifadənin qonduğunu hiss elədim.

Üzlərindəki ifadayə diqqətlə baxanda elə görünürdü ki, sanki, bu ifadə onların üzündə ilk dəfə yaranıb. Birdən birə bunun "dozası" onlara çox gəlib. Əhməd bunun ardınca da bu sükutu pozub qayıtdı ki, "pişikləri qısırlaşdırmağa gətirmişəm." Bunu deyəndən sonra bu bədbəxt camaatın nümayəndələri bir az əvvəl onlarla üzbəüz gələn həqiqətə, yəni onları qorxudan bu nəhəng bədheybətə özlərini güclü göstərmək üçün B planına keçib, həmişə elədiyi şeyi elədi: gülüb keçmək qərarına gəldi...

Öz aralarında talışca nəsə danışıb, yənə şaqqanaq çəkib güldülər. Bu səfər isə Əhməd yənə səbrli davrandı və pişikləri qısırlaşdırmağın səbəbinin nə olduğunu pişiyə başa salırmış kimi başa saldı bu insanlara. Onlar yənə susdu...

Bunu yazını Əhmədin nə qədər səbrli, mərhəmətli, nəzakətli və savadlı olduğunu, belə birinə cinyatkar deməyin elə özünün cinayətkarlıq olduğunu bir daha xatırlatmaq üçün yazmışam...

Təbrik edirəm, Əhməd!

Elə sənin də Afiəddin Məmmədova yekun məhkəməsində dediyin kimi: "Gün gələcək, bu məhkəməyə səni bura salanları gətirəcəyik!

Son dövrlərdə tanıdığım gənclərə hər mənada örnək olacaq bir şəxsiyyətin bu gün 24 yaşı tamam olur. O kəs ki, savadı, mədəniyyəti, mərifəti ilə qısa zamanda ailəmin və mənim rəğbətimizi qazandı. Əsl dost, əsl doğma, dəyərli Əhməd Məmmədlidən gedir söhbət.

Tək başına o qədər cəsarətli o qədər güclü, yeri gəldikcə təmkinli, zəhmətkeş, qayğıkeş, diqqətcil biridir ki, Əhməd çevrəsində heç kəsi gözdən qoymaz. Onun ürəyinin gözəlliyi humanistliyi hələ bu ayrı bir mövzudur.

Qarışqanı tapdamağa ehtiyat edən Əhmədi bu gün kimisə bıçaqlamaqda ittiham edirlər. O Əhməd ki, hər dəfə dərsə qoşulanda Gülər, uşaqları incitmə, deyirdi. Təmənnasız gözləntisiz Əhməd bu gün heç onunla əlaqəsi olmayan bir mövzu ilə şərlənərək həbs edilib.

Təmiz adamlara kim nə çamur atır atsın o çamur onları kirləndirməz geri qayıdıb atanların öz üzərinə yapışar. Bundan sonra yüz il keçə Əhmədi şəxsən tanıyan heç kəs onun bu cinayəti törətdiyinə inanmaz. 2016-cı ildə mənim qardaşımı da narkotik ittihamçısı kimi şərləyib həbsə salandan ta ölənə qədər rayonda bizi tanıyan bilən hər kəs bu saxta ittihama inanmadı hələ indiyə qədər hamı deyir ki, qardaşını sifarişlə məhv etdilər atana görə həm də. Vaqiəsi Əhməddən uzaq.

Onsuz da bu ölkədə hamı kimin kim olduğunu kimlərin niyə həbs edildiyini kimlərin günahkar olsalar da niyə azadlıqda olduqlarını A-dan Z-yə hər kəs bilir. Su testesi su yolunda qırılar deyib atalar. Əhməd Məmmədliyə indiki halda ancaq haqqı olan azadlığını arzulayıram sağlamlığı da bu şərtə bağlıdır Əhmədin.

Əhməd Məmmədli ilə tanışlığım sosial şəbəkələr vasitəsi ilə olub. Onun haqqında ilk xəbəri indi də xatırlayıram. Bu cavan oğlan tək başına Lənkəran Dövlət Univeritetində boğulan tələbələrin haqq səsini ucaltmaq üçün əyalətə, gözdən uzaq bir yerə tək başına səfər edəcək qədər cəsarətli, qorxmaz adam imiş. Xoşbəxtlikdən həmin gün çox ciddi hadisələr baş vermədi. Əhməd sağ salamat, həbs olunmadan Bakıya qayıda bildi. Daha sonra Əhməd xalqların qardaşlığı, sülh və pasifizm mövzulu yazılar yazdı, çıxışlar etdi. Onun proseslərə səmimi reaksiyası, müharibəyə qarşı formalaşmış qəti mövqəyi mənim ona olan hörmətimi daha da möhkəmlədirdi.

Əhmədlə yoldaşlığımızın ən yaddaqalan məqamları isə heç şübhəsiz “Yoldaş Kitab” təşəbbüsü ilə kitab müzakirələrindəki görüşlər oldu. Mənim də kitabımın müzakirəsini təşkil edən Əhməd Məmmədli ilə daha sonra həbsindən çox qısa müddət əvvəl yenə kitab və ədəbiyyat vəsiləsi ilə görüşdük. O, tamamilə nəzarət altına alınan və heç bir azadlıq meyli göstərməyən mətbuat nümayəndələrindən fərqli olaraq, bizim ədəbiyyat söhbətlərimizi çəkib göstərdi. Onun " Yoldash Media " təşəbbüsü neçə-neçə kölgədə qalan və ictimailəşməyən hadisəyə işıq tutdu, çox zülmətlərə günəş oldu. Bu gün dostum Əhməd Məmmədli peşəkar və ləyaqətli jurnalistika fəaliyyətinə görə həbsdədir. Ona azadlıq tələb edirəm.

Mənim Əhməd müəllimlə tanışlığım anam sayəsində olub. Onlar eyni yerdə işləyirdi. Oxumaq, hazırlığa getmək istəyirdim amma buna ailəmin imkanı yox idi. Anam da bunu Əhməd müəllimə danışmışdı. Əhməd müəllim təmənnasız təhsilimə kömək etdi. Mən tək deyildim, mənim kimi Əhməd müəllimin başqa şagirdləri də var idi. Tarix dərsindən hazırlaşdırdı məni ilk öncə, sonradan ingilis dili ve digər dərslərdən də yardım etdi.

Gülərüz, oxumağımız üçün çalışan biri idi. O təkcə müəllim yox, həm də çox yaxşı dost idi. Maddi və mənəvi çox dəstək olurdu, oxumaq üçün ruhlandırır, motivasiya verirdi. Bir sözlə, o möhtəşəm biridir.

O da mənim kimi heyvanları çox sevir, hətta onlara zərər gəlməsin deyə vegeteriandı. Küçədən çoxlu pişik sahiblənmişdi ve o gözel pişiyin biri indi bizim ailəmizin bir parçasıdır. Bu qədər mərhəmətli, yaxşı bir insan necə kiməsə zərər verə bilər !? Mən xəbər saytlarında yayılan məlumatın yanlış olduğunu düşünürəm. Əhməd müəllimin başına gələn bu bədbəxt hadisəyə görə təkcə müəllimimi yox, ən yaxın dostumu da itirmişəm. Mən istəyirəm ki, o yenidən bizimlə olsun.

Yoldaş Media-nın təsisçisi, dostumuz Əhməd Məmmədli 6 il müddətinə azadlıqdan məhrum edildi.Hər gün hansısa dostumuzun həbs qərarı ilə bağlı paylaşım etməkdən ürəyimiz xəstəliyə düşdü. Dostlarımızın isə ömrü günü çürüdülür. Heç bir günahları olmadığı halda, hərəsinin bu cavan ömründən 5-10 il oğurlayırlar. Çox ağır dərddir. Əhməd Məmmədliyə azadlıq!

Bu gün dostumuz Əhməd Məmmədliyə hökm oxundu və 6 il azadlıqdan məhrum edildi.

Mən Əhmədi 5 ildən çoxdur ki, tanıyıram və ən səmimi, dürüst hisslərlə demokratiya, insan haqları üçün mübarizəsinə bələdəm.

Bu gün Əhməd məhz bu səmimiliyinə görə cəzalandırılır.

Baş verən n qədər şeyə, ölkədə ictimai-siyasi mühitin daralmasına, bütün repressiyalara baxmayaraq təşkilatlanmağa, mübarizə aparmağa davam etdiyi üçün, müstəqil mətbuatın əzildiyi dövrdə jurnalistika fəaliyyətinə başladığı üçün bu yaşında azadlıqdan məhrum edilir.

Azərbaycanın bu ölkədə ictimai müzakirə yaratmağa çalışan gənclərinə yaşatdıqları çox dəhşətlidir.

Əhməd azad edilməlidir. Digər bütün dostlarımız və haqsız yerə həyatını dörd divar arasında keçirən 400-dən çox siyasi məhbus kimi.

Bilirsiniz necədir, siz hər dəfə yoldaşlarımızı belə həbs edəndə bizim siyasi qəzəbimiz, sizə olan nifrətimiz bir az da artır. — Sonra qullar dünyasının intiqamı yaman olur...

Müvəqqəti susqunluğumuzun da sonu mütləq ki, gələcək. Həmin günü ailəni də götür, qaça bildiyin qədər uzağa qaç...

Bu gün Əhmədin məhkəməsində bir səhnə gördüm sanki ədalət zalı yox, ucuz tamaşa idi. Hakim gülür, şahid gah nala vurur, gah mıxa; bir dediyini o biri dəqiqə təkzib edir. Şər atırsınızsa da, heç olmasa inandırıcı edin. Bu qədər ziddiyyət, bu qədər süni ssenari ilə həqiqəti gizlətmək olmur. Əhməd rejim tərəfindən şərlənərək həbs olunması artıq sual yox, açıq görünən reallıq təsiri bağışlayır.

Əhməd bəy Azərbaycan gəncliyinin müasir, intellektli gənci, Azərbaycan siyasi arenasının ictimai fəalı, azad media işçisi kimi xatirələrimizdə ən xoş izlərini buraxmış cəsarətli, fədakar dostumuzdur.

Əhməd bəyə azadlıq tələb edirəm!

Söyüdlü hadisəsindən sonra Qiyas həbs edilmişdi. Əhmədlə Afiəddinin işiylə bağlı hansısa idarəyə getmişdik ki, Mehman gəlib bizi apardı ki, Qiyası yenidən məhkəməyə çıxarırlar. Qorxduq ki, bu dəfə cinayət işi açacaqlar. Bizi içəri buraxmadılar, çıxışda Mehman gülürdü ki, 1 gün uzadıblar, amma aclıq edir. Aclıq etdiyi üçün də Şura xalanın halı pisləşmişdi. Uşaqlarla arxa qapıya getdik, dedik çıxışda gözləyək, görərik. Bizim orda olduğumuzu görüb çıxarmırdılar. Axır hamı dağılışdı, mən dirəşdim ki, qalacam. Əhməd də mənimlə qaldı. 2 saatdan çox gözlədik, amma çıxarmırdılar. Telefonlarımızın isə zaretkası bitmək üzrəydi. Telefonu hazırda saxlamışdıq ki, çəkərik. Əhmədin zaretkası qurtardı, mən isə pilot rejiminə atdım, amma getmədik. Məcbur qalıb çıxaranda “Söyüdlüyə azadlıq” deyəndə çəkə bildik. Tez-tələsək maşına soxdular deyə də nəsə soruşa bilməmişdik.
Saat da gec idi. Yaxın bir restorana gedib, telefonları zaretkaya qoyduq, interneti açdıq ki, ortalığı qatıblar. Hamı elə bilib ki, bizi də saxlayıblar. Paylaşan paylaşana. Nəysə, gülə-gülə hamıya tək-tək yazıb yaxşı olduğumuzu izah elədik.

Əhməddən yazacaq çox xatirəm var. Tanıdığım ən gözəl, ürəyiaçıq insanlardan birisidir. Azadlıq isə onun haqqıdır.

Ülviyyənin də Əhmədin də ölkədən çıxışına qadağa qoymuşdular.
Əhməd haqsız yerə təhsil hüququ pozularq qanunsuz şəkildə əsgərliyə aparılmasına dirəndiyi üçün bir neçə ildir ki, onsuz da problem yaşayırdı. Qısası hər ikisinə xəbərdarlıq edirdilər ki, "bax ha ağıllı olun, həbsə gedə bilərsiz". Onlar isə vicdanlı olmağı seçdilər.
Ölkədə bütün şərəfi-vicdanı olan jurnalistlərin, müxbirlərin, əli kamera, qələm tutanların az qala hamısının zindanda olduğu vaxt Tofiq Yaqublunun son məhkəməsində çəkiliş etdilər deyə artıq şər hakimiyyəti tərəfindən həbslərinə qərar verildi. İstər artıq həyatını itirmək üzrə olan Tofiq Yaqublunun ətrafında baş verənlər istər ölkədə baş verən hər hansı hakimiyyət qaynaqlı alçaqlığın işıqlandırılmasına dözümü yoxdu gücdən zəhərlənənlərin.
Davam edin, belədirsə sona yaxınlaşırıq.

Əhməd Məmmədlinin gözünün iki dəfə əməliyyat olunması barəsində daha əvvəl danışmışdıq özü ilə. Görməsi zəif idi , indi də aldığı zərbələrdən görməsini itirmək təhlükəsi yaranıb. Saxlanılarkən fəalları döyüb , işgəncə verirlər, sonrasında bunun fəsadları ilə yaşamağa məcbur edilir, müayinə, müalicə kimi ehtiyaclarını ödəməsinə mane olurlar.

Ölkəmizdə azad medianın yox olmaq təhlükəsi ilə üz-üzə olduğu bir dönəmdə, Əhməd Məmmədli böyük risklərə baxmayaraq "Yoldaş Media" platformasını yaratdı. Bu platforma qısa müddətdə haqsızlığa məruz qalmışların, xüsusilə də siyasi məhbusların səsi oldu. Əhməd Məmmədli İqbal Əbilovun məsələsini daim gündəmdə saxladı. Təkcə öz platformasında deyil, həm də dostlarının dəstəyi ilə digər media orqanlarında bu məsələni işıqlandırdı, onun azadlığı uğrunda ictimai dəstək yaratdı.
Müdafiə Komitəsi olaraq biz, Əhməd Məmmədlinin göstərdiyi bu prinsipial və cəsarətli mövqeyini heç vaxt unuda bilmərik. Biz Əhməd Məmmədliyə azadlıq arzulayırıq! Ədalətin gec də olsa zəfər çalacağına inanırıq.
Həqiqət heç vaxt susdurula bilməz!

Heç unutmaram. Toyumuzda Bakıdan gələn 50-dən çox qonaqlar var idi. Həmin qonaqlar vətəndaş cəmiyyəti və müxalifət üzvlərindən ibarət idi. Bu qədər adam Bakıdan sırf bizim toyumuza görə Cəlilabada gəlmişdilər.

Toyumuzda belə bizi rahat buraxmadılar. Şadlıq sarayının qapısında mülki polislər dayanmışdı, həyətində isə polislər maşınları ilə gözləyirdilər. Mən anlamıram ki, niyə bunu edirlər ? Bu adamların toyda aksiya edəcəyindənmi qorxdular ? Yoxsa, yeni evlənmiş cütlüyə mesajmı ötürürdülər?

Yəni, "harda olursan ol, biz daima səni izləyəcəyik ! " Bu idi mesajları ?

Məncə də bu idi çünki biz evlənəndən sonra Bakıda ilk kirayə qaldığımız evdən çıxarıldıq. Bu hadisə ard-arda təkrar etdi.

Əhməd dəfələrlə 1-2 ay olmamış işlədiyi yerlərdən ( otəllərdə resepşın, menecer və s. ) çıxardıldı.

Niyə imkan vermirsiz xoşbəxt olaq !?
Bunu bilin ki, həyat bumeranqdır. Yaşatdığını yaşamadan ölməzsən.

Əhməd Məmmədli məhbus övladlarına pulsuz dərs keçirdi hətta dərs keçə biləcək müəllimlər axtarırdı. Yəni özü fədakarlıq edib uşaqlar üçün çalışırdı.
Həmçinin Afiyəddin Məmmədov da işçilərin hüquqları üçün səy göstərirdi.
Bu mənfur rejim xalq üçün çalışan hər kəsi şərləyərək həbs etdirməklə sıradan çıxartmağa çalışır.

Əhməd Məmmədlini 2021-ci ildə Lənkəran Dövlət Universitetinin qarşısında talış dilində fakültənin açılması tələbi ilə oxuduğu bəyanatla bağlı xəbərlərdən tanıdım. Elə o vaxtdan onun cəsarətinə heyran qaldım: talış olmaya-olmaya bu qədər açıq və qətiyyətli mövqe nümayiş etdirmək hər kəsin cəsarət edəcəyi iş deyil idi.

2024-cü ildə İqbal Əbilov həbs olunanda da Əhməd onun müdafiəsinə qalxan ilklərdən biri oldu. İqbal Əbilov və ümumilikdə talış məsələsi haqqında məqalə yazdı və həmin yazı xarici mediada yayımlandı. Elə həmin ilin parlament seçkilərində təsadüfən ikimiz də eyni dairədə müstəqil müşahidəçi idik. Mən ona yaxınlaşıb göstərdiyi bu dəstəyə görə təşəkkürümü bildirdim. O qısa ünsiyyətdən sonra Əhməd Məmmədli və onun ailəsi ilə aramızda səmimi bir dostluq yarandı.

Əhməd Məmmədli həbs olunduğu son ana qədər səssizlərin səsi oldu. Ürəkdən arzulayıram ki, tezliklə azadlıqda görək onu.